لەژێر دروشمی " لەرێبازدا قووڵبوونەوە، لەرێكخستندا بەگەلبوون"دا لەرۆژى (1) ى ئایارى ( 2008)دا پارتیمان پارتى چارەسەرى دیموكراتى كوردستان چوارەمین كۆنگرەی ئاسایی خۆی لە شارى كەركوك لە هۆڵی (یانەى مامۆستایان) سازدا و بۆ ماوەی سێ رۆژ بەردەوام بوو. كۆنگرەكە بە خولەكێك رێزگرتن لەگیانى بێگەردى شەهیدانى رێگاى ئازادی و بە ئامادەبوونى شاندێكی كۆنگرەی نەتەوەیی كوردستان (KNK) و چەندین پارت و رێكخراو و كەسایەتى دیموكراتخوازی كورد و عەرەب دەستیپێكرد و وتاری چەندین پارت و رێكخراوی كوردستانى خوێندرایەوە. لەكۆنگرەكەدا (140) ئەندامى هەڵبژێردراوى كۆنفرانسە مەحەلییەكانى شارەكان و (30) ئەندامى گوێگر و چەند كەسایەتییەكی دۆست لە عەرەب و كوردی ئێزیدی وەك میوان بەشداربوون. پاشان كۆمیتەى ئامادەكارى كۆنگرە بەخوێندنەوەى راپۆرتێك باسی لەكار و ئامادەكارییەكانى خۆی كرد. هەروەها وتاری كردنەوەى كۆنگرە لەلایەن سەرۆكی پارتیمان بەڕێز (د. فایق محەمەد گوڵپی)یەوە پێشكەش كرا. لەم كۆنگرەیەدا بروسكە و پەیامی چەندین پارت و رێكخراو و دەزگای كوردستانى خوێندرایەوە. لەمیانەى دەستنیشانكردنى دیوانى بەڕێوەبردنى كۆنگرە و دەستنیشانكردنى بەرنامەى كاردا كۆنگرە دەستى بەكارەكانى خۆی كرد؛ سەرەتا سەبارەت بە راپۆرتی سیاسی پێشكەشكراو بەكۆنگرە و رەوشی سیاسی و رێكخستنى و ئەركەكانى قۆناخی ئێستا و داهاتوو گفتوگۆیەكى تێروتەسەل كرا. پاشان گفتوگۆ سەبارەت بە بەرنامە و پەیڕەوی ناوخۆی پارتیمان ئەنجامدرا و گۆڕانكاری گرنگ و پێویست لە بەرنامە و پەیڕەوی پارتیدا كرا. هەروەها بەئامادەبوونى پێنج لەهەڤاڵانى رێكخستنى ئەوروپا راپۆرتى رێكخستنى ئەوروپا خوێندرایەوە و گفتوگۆیەكى تایبەتى سەبارەت بە كار و خەباتى رێكخستنى ئەوروپای ( پ چ د ك) ئەنجامدرا. ئەمەو لەچوارچێوەی (17) پرۆژە بڕیاردا چەندین بڕیاری گرنگ و نوێ وەرگیران.
دوابەدوای گفتوگۆ و بڕیارەكان، كۆمیسیۆنێكی تایبەت بەهەڵبژاردنەكان هەڵبژێردرا و ئەو كۆمیسیۆنە سەرپەرشتى پرۆسەى هەڵبژاردنەكانى سەرۆكی نوێی پارتى و ئەنجوومەن و دەزگاى دیسپلینى پارتى كرد. سەرەتا سەرۆكی پێشووی پارتى هەڤاڵی بەڕێز (د. فایق محەمەد گوڵپی) وتەیەكی سەبارەت بە هەڵبژاردنى سەرۆكی پارتى پێشكەش كرد، كەتێیدا وەك نەریتێكی دیموكراتیانە و هاوچەرخانە خۆكاندیدنەكردنى خۆی راگەیاند و پێشنیاری خۆیشی بۆ سەرۆكی پارتى پێشكەشكرد، كە هەڤاڵی بەڕێز (دیار غەریب) بوو. لەم هەڵبژاردنەدا بەڕێز (دیار غەریب) بەزۆرینەی دەنگەكان بە سەرۆكی نوێی (پ چ د ك) هەڵبژێردرا. پاشان ئەنجوومەنێكی حەڤدە كەسی هەڵبژێردرا. لەگەڵ هەڵبژاردنى ئەندامانى دەزگاى دیسپلینی پارتى كۆتایی بە پرۆسەى هەڵبژاردنەكان هات.
بەگوێرەى پەیڕەوی ناوخۆی پارتیمان كە پێویستە هەردوو ساڵ جارێك كۆنگرەى ئاسایی خۆی ببەستێت، چوارەمین كۆنگرەى پارتیمان وەك كۆنگرەیەكی ئاسایی لەیەكی ئایار جەژنى كرێكار و رەنجدەرانى جیهاندا دەستی بەكارەكانی خۆی كرد و لەماوەی سێ رۆژدا، لەكەشوهەوایەكى دیموكراتییانەدا گفتوگۆیەكی چڕوپڕ بەڕێوەچوو و چەندین بڕیاری گرنگ و مێژوویی وەرگیردران.
لەچوارچێوەى هەڵسەنگاندنى رەوشی سیاسیدا وێڕاى ئاماژەكردن بەو رەوشە دژوار و گێژاوییەى كەوا سەرمایەى جیهانى رووبەرووى مرۆڤایەتى كردۆتەوە، ئەوا جەخت لەسەر ئەوەش كرایەوە كەوا لە ئانوساتی ئێستادا گەلەكەمان و بزاڤە ئازادیخوازەكەی بەقۆناخێكی زۆر هەستیار و مێژووییدا تێدەپەڕێت. بەتایبەتى دواى بەرخۆدانە شكۆدارەكەى (زاپ) و شكستى شاڵاو و هێرشە داگیركارییەكان كە لەگەڵ خۆیدا دۆخێكی پڕ لەدەرفەت و دەسكەوت و لەهەمانكاتدا پڕ لە هەستیارى خوڵقاندووە. بێگومان ئەمەش ئەرك و بەرپرسیارێتى گەل و پارتیمانی لەئانوساتێكی وەهادا زیاتركردووە. بۆیە لەمڕووەوە بەرزكردنەوەى ئاستی تێكۆشان و بەرخۆدان و قورسایی دان بە یەكێتى نەتەوەیی و دیموكراتییانە وەك ئەركێكی دەستلێبەرنەدراو هەڵسەنگێنرا.
هەروەها گفتوگۆیەكی بەرفراوان و قووڵیش سەبارەت بە بارودۆخی سیاسی، ئابووری، كۆمەڵایەتى و كولتووری باشووری كوردستان و ئێراق كرا و ئەوە دەستنیشانكرا كە ئەمڕۆ لە باشووری كوردستاندا وێڕای بەدەستخستنى چەندین دەسكەوتى بەهاداری نەتەوەیی و دیموكراتى، بەڵام گەندەڵی، قۆرخكردن و پاوانخوازی بنەماڵەیی و حزبی و پەیڕەوكردنى سیاسەتى مشەخۆری و بێبەرهەمی لەم حەڤدە ساڵەدا گەلێك دەسكەوت و دەرفەتى زێڕینى لەدەست گەلەكەمان بەفیڕۆ داوە، هەڵبەتە لاوازی ئۆپۆزسیۆنى دیموكراتى و رێكخستەنەبوونى جەماوەری دۆخەكەى دژوارتر كردووە. تا ئەو رادەیەى خەڵك لەزۆر ماف و پێداویستى و خزمەتگوزاری مەحروم كراون و ناڕەزایی و بێزاری خەڵكیش گەیشتۆتە ئاستێكی بەرز، توندوتیژی لەبەرامبەر ژنان بێسنوور تەشەنەی سەندووە. كەچی تا ئێستا ئەو بێزاری و ناڕەزاییەى خەڵك نەگەیشتۆتە ئاستى هوشیاربوونەوە و رێكخستەبوون و نواندنى چالاكی دیموكراتیانەى بەرفراوان و گشتگیریانەوە. هەروەها لەلایەكی دیكەشەوە چەندین كێشە و گرفتی سیاسی و نەتەوەیی گەلەكەمان لەئاستى ئێراقدا بەبێچارەسەری ماوەتەوە، لەسەرووی هەموویانەوە مەسەلەى كەركوك و ناوچە دابڕاوەكانى دیكە، كە بەهۆی سیاسەتى سازشكارانە و بێبەرنامەیی و وابەستەبوون بەدەرەوە، تادێت كێشەكان قووڵتر و ئاڵۆزتر دەبن. بۆیە لەپێناو پاراستنى ماف و دەسكەوتەكانى گەلەكەمان و دابینكردنى پێداویستی و خزمەتگوزارییەكان، هەروەها لەپێناو چارەسەركردنى تەواوى كێشە و گرفتە هەڵواسراوەكاندا بەكێشەى كەركوكیشەوە، بڕیاری رێكخستەكردن و چالاككردنى جەماوەر، تێكۆشان لەبەرامبەر گەندەڵی و هەموو شێوە قۆرخكارییەك درا و بە ئەركێكى نەتەوەیی و دیموكراتیی بەپەلە بینرا و پێویستە پارتیشمان وەك پارتێكی نەتەوەیی دیموكراتیى ئۆپۆزسیۆن، رۆَڵێكی چالاكتر و مەزنتر ببینێت.
هەروەها سەبارەت بە رەوشی رێكخستنی پارتیمان و ئەرك و بەرپرسیارێتییە نەتەوەیی و دیموكراتییەكانى جەخت لەسەر ئەوە كرایەوە كە پارتیمان لەدوای كۆنگرەی سێیەمەوە تاكو ئێستا، وەكو رابردوو، لەمیانەى پێداگری لەسەر خەبات و تێكۆشانى هەمەلایەنەى خۆیەوە لەلایەن هێزە دەسەڵاتدارەكانى هەرێمی كوردستانەوە رووبەرووی فشار و گوشارێكی بێسنوور بووەوە، بارەگاكانمان لەهەولێر و سلێمانى و دهۆك داخران، چەندین ئەندام و دۆستمان دووچارى فشار و گرتن بوونەوە، هەڵبەتە ئامانج لە هەموو ئەو گوشار و فشارانەى دەسەڵاتدارانیش ملكەچكردن و چۆكپێدادانى پارتیمان بوو، شكاندنى باوەڕی و ئیرادەى تێكۆشانى نەتەوەیی و دیموكراتیانە بوو، بەڵام پارتیمان وەك پارتێكی پەیوەست بە پرەنسیپە نەتەوەیی و دیموكراتییەكانى خۆیەوە، نەك هەر ملكەچ نەبوو و چۆكی دانەدا، بەڵكو پێداگری و جۆشوخرۆشی تێكۆشانى خۆی، باوەڕی و ئیرادەى بەرخۆدانى خۆی تۆكمە و بەهێزتر كرد. هەروەها ئەوەش دەستنیشانكرا كە لەكار و خەباتماندا كەموكوڕی و كەمتەرخەمی جددیش روویانداوە، كە لەئاكامدا وەك كۆسپێك هاتۆتە بەردەم كار و خەباتی پارتیمان. بۆیە لەچوارچێوەی ئەو رەخنە و پێشنیارانەى پێشخران بۆ دەربازكردن و بەلاوەنانی ئەو كەموكوڕی و كەمتەرخەمیانە و لەژێردروشمی " لەرێبازدا قووڵبوونەوە، لەرێكخستندا بەگەلبوون"دا بەخۆداچوونەوە و هەنگاوهەڵهێنانێكی مەزن وەك ئەركێكی سەرەكى قۆناخ دەستنیشان كرا.
ئەمەو سەرجەم بەشداربووانى كۆنگرە جەختیان لەسەر ئەوە كردەوە كە پێویستە لەمیانەى پەیوەستبوون بە فیكر و فەلسەفەى ئازادیخوازانەى رێبەر ئاپۆ و رۆحی چالاكیخوازانەى هەڵمەتى "ئیتر بەسە"دا، پەرە بەتێكۆشانى نەتەوەیی ـ دیموكراتی بدرێت. لەم چوارچێوەیەدا چەندین بڕیاری وەرگرت، هەندێك لەو بڕیارانەش ئەمانەى خوارەوەن:
1ـ لەپێناو پاراستن و خاوەنداریكردن لە ژیان و تەندروستى رێبەر ئاپۆ و ئازادكردنیدا هەموو هەوڵ و چالاكییەكان لەچوارچێوەى هەڵمەتى "ئیدى بەسە"دا چڕبكرێتەوە و فراوانتر و كاریگەرتر بكرێت. هەروەها كۆمیتەى پاراستنى تەندروستى رێبەر ئاپۆ لە باشوورى كوردستان فراوانتر و چالاكتر بكرێت و بگەیەنرێتە هەموو شوێنێك.
2ـ هەوڵ و توانستەكان بۆ تێگەیاندن و تێگەیشتن لە سیستەمى كۆنفیدراڵیزمى دیموكراتى زیاتر چڕ و فراوان بكرێت و وەك رۆژەڤێكی بنچینەیی بەردەوام و پارچەیەكى سەرەكى خەباتى پەروەردەیی و ئایدیۆلۆژی گرنگى پێبدرێت. لەم پێناوەدا توانستە راگەیاندنى و پڕوپاگەیاندەیی و پەروەردەییەكان سەفەربەر بكرێت.
3ـ هاوتەریب لەگەڵ تێگەیشتن و تێگەیاندنى سیستەمى كۆنفیدرالیزمی دیموكراتیدا هەنگاو بەهەنگاو و بەبێ دوودڵی توانستەكانى پێكهێنان و جێبەجێكردن و پێشخستنی سیاسەتى گەل زیاتر بكرێت و كۆنفیدراڵیزمی دیموكراتى وەك سیستەمێكى گەل خۆی بچەسپێنێت. لەم چوارچێوەیەدا لەئاستى رێكخستنی و جەماوەریدا وەك مۆدێلی ژیان و بەڕێوەچوون و بەڕێوەبردن هەوڵی چەسپاندن و پێكهێنانى بدرێت و هەوڵ بدرێت لە ئاستى كرداریدا ئەو سیستەمە لە گوند و گەڕەك و شارەدىَ و شارۆچكە و شارەكاندا بچەسپێت.
4ـ تا گەیشتن بەئازادی و گشت مافە نەتەوەیی و دیموكراتییەكان لەتەواوى كوردستان بەگشتى و باشووری كوردستان و ئێراق بەتایبەتى هەڵمەتى "ئیدی بەسە" وەك هەڵمەتێكى چارەنووسساز زیاتر پێشبخرێت و لەئاستى نەتەوەیی و دیموكراتیدا چالاكی و رێكخستەبوون پێشبخرێت.
5ـ لەبەرامبەر سەرجەم ئەو پیلانگێڕی و مەترسیانەى رووبەرووى گەلەكەمان و دەسكەوت و بەهاكانى دەبێتەوە، بەتایبەتى لەبەرامبەر ئەو سیاسەتەى قۆرخكردن و بەهەدەربردنى دەسكەوتە بەدەستخراوەكانى گەلی لێدەكەوێتەوە، هەڵمەتى "ئیدی بەسە" وەك بەرسڤێكى جەماوەری فراوان رێكخستە بكرێت.
6ـ لەبەرامبەر ئەو كولتوور و نەریت و ئەقڵییەتى پیاوسالاری ـ دەوڵەتگەرادا كە توندوتیژی دژ بە ژنان و كوشتن و بێناسنامەكردنى ژنان رەوا و پەیڕەو دەكات تێكۆشانێكی ئایدیۆلۆژی چڕوپڕ بەڕێوەببرێت و ریسوا و شەرمەزار بكرێت و لەم رووەوە ئاستى چالاكنواندن و هوشیاركردنەوەى تاك و كۆمەڵگا بەرزبكرێتەوە و دیموكراتیزەكردنى خێزان و سیستەمى كۆمەڵایەتى و حقوقی پێشبخرێت.
7ـ سەرەڕاى كەموكوڕییەكانى نێو دەستووری ئێراق بەگشتى و ماددەی (140) بەتایبەتى، جەخت لەسەر پشتگیری چارەسەری دەستووریانەى كێشەى كەركوك و ناوچە دابڕاوەكانى دیكە دەكەینەوە. لەروانگەی "كەركوك سیبمۆلی ئیرادەی سەربەخۆی گەلی كوردستانە"و " با كەركوك سیمبۆلی شاری بەیەكەوە ژیانى ئازادانەى گەلان بێت" توانستی جەماوەری گەل وەك گەرەنتی سەرەكی یەكلاییكردنەوەى كێشەى كەركوك و ناوچە دابڕاوەكانی دیكە بخرێتەڕوو.
8ـ لەچوارچێوەى پرەنسیپی بەرگری رەوادا؛ لەبەرامبەر هەر هێرش و شاڵاوێكی داگیركاریی و هەر فشار و پیلانگێڕییەكی هەرێمى و نێودەوڵەتییدا بەرخۆدانى نەتەوەیی و یەكڕیزی و هاوهەڵوێستى ئەركێكی ژیانیی و دەستلێبەرنەدراوە.
9ـ لەپێناو بونیادنانی نەتەوەیەكی دیموكراتدا هەوڵ و تەقەللاكان بگەیەنرێنە ئاستى سازدانى كۆنفرانس یان كۆنگرەیەكى نەتەوەیی. لەم چوارچێوەیەدا گەڵاڵە پرۆژەیەك یان "نەخشەیەكی رێ"ئامادەبكرێت و بۆ تاوتوێ و گفتوگۆكردن پێشكەش بە رای گشتى گەل، هێز و لایەنە كوردستانییەكان، دەزگا و رێكخراوە مەدەنییەكان و كەسایەتییە نەتەوەیی و نیشتمانپەروەرەكان بكرێت. لەم چوارچێوەیەدا هەوڵی دروستكردنى كۆمیتەیەكى ئامادەكار و هەڵسوڕێنەر بدرێت.
10ـ لەچوارچێوەی داڕشتنی پەیمانێكی نەتەوەیی یان دەستوورێكی نەتەوەیی دیموكراتیدا رۆح و هزر و كرداری نەتەوەیی دیموكراتى لەرووی ئابووری، سیاسی، كولتووری و ...هتد پێشبخرێت.
11ـ هاوتەریب لەگەڵ رەوایەتى كێشەی گەلەكەمان لە دەوڵەتەكانى توركیا، ئێران و سوریادا ئەوا پشتگیری و هاوخەباتی و هاوچارەنووسی تەواوی خۆمان لەتێكۆشان و بەرخۆدان و بەرگری رەوای گەلەكەمان لە باكوور و باشووری رۆژئاوا و رۆژهەڵاتی كوردستان و هەندەران دەردەبڕین، هەروەها بڕوا و هیوای ئازادی و سەركەوتنی گەلەكەمان لەو پارچانەی كوردستان بەمسۆگەری و بەروونى دەبینین.
12ـ لەچوارچێوەى هەڵمەتى "ئیدی بەسە"دا جەماوەر لەسەر بنەمای رووبەرووبوونەوەیەكى مەدەنی و دیموكراتیانەى پەتاى گەندەڵی، نەبوونى شەفافییەت و نادیارى بودجە و سیاسەتى مشەخۆری و بێبەرهەمكردن و بێڕەنج هێشتنى تاك و كۆمەڵگا هوشیاركردنەوە و رێكخستە و چالاككردنى جەماوەر زیاتر پەرەى پێبدرێت و توانستەكانى پروپاگەندە و راگەیاندن و پەروەردەكردن لەم پێناوەدا بخرێتەگەڕ و ئەو پەتا و سیاسەتە بەشێوەیەكى بەرفراوان ئاشكرا و ریسوا بكرێت.
13ـ هوشیاری بەرهەمهێنى و پشتبەخۆبەستن و رۆحی خۆهێزی وەك ستوندێكی بنچینەیی ئاسایشی نەتەوەیی بڵاوبكرێتەوەو راهێنانى گروپی بەرەنگاربوونەوەى گەندەڵی ئیداری و حزبی. هەروەها لەپێناو بوژاندنەوەى ئابووری وڵاتدا، لەهەموو رووێكەوە هانى ئاوەدانكردنەوە و بوژاندنەوەی گوندەكان بدرێت و رۆحی رەنجدان و بەرهەمهێنان و پشتبەخۆبەستن پێشبخرێت.
14ـ بە سوود وەرگرتن لە ئەزموونەكانی رابردوو توانست و زەمینەى هاوپەیمانێتى دیموكراتى ئۆپۆزسیۆن بڕەخسێندرێت و پرۆژە و دەستپێشخەری پێویست پێشكەش بە هێز و لایەنە دیموكراتییەكان بكرێت و گفتوگۆ و دیالۆگی كراوە پێشبخرێت كە ئامانج لێی دیموكراتیزەكردنى دەسەڵات و سیاسەت بێت لەهەرێمى كوردستاندا.
15ـ لەبەرامبەر چەمكی قۆرخ و پاوانكردنى سیاسەت لەلایەن نوخبەی سیاسی باڵادەست و سیاسەتى پەراوێزخستنى ئیرادەی سیاسی سەربەخۆی جەماوەر، تێكۆشانێكی بەرفراوان پێشبخرێت و هوشیاركردنەوە و رێكخستەكردن و چالاككردنى جەماوەر فراوان و قووڵتر بكرێتەوە و زەمینەی پێشخستنى سیاسەتى ئازاد و دیموكراتی بڕەخسێندرێت.
16ـ گرنگی تەواو بە بڵاوكردنەوەى هوشیاری ژینگەیی و كولتووری ژینگەپارێزی وەك ئەركێكی وڵاتپارێزی بدرێت و لەژێر دروشمی:"لەشوێنى هەر مینێك درەختێك" كەمپینى نەمام چاندن پێشبخرێت.
17ـ لەبەرامبەر ئەو رەوشە داگیركاریی و گێژاوە سیاسی و ئابووری و كۆمەڵایەتى و كولتوورییەى لەئێراقدا باڵادەستە لەسەرووی هەموویانەوە ئەمریكا و هاوپەیمانەكانى، هێزو لایەنە دەسەڵاتدارەكانى ئێراق، رژێمە دەسەڵاتدارەكانى هەرێمەكەو هێزە فێندەمەنتالییەكان بەرپرسیارن. لەسەر ئەم بنەمایە پێویستە لەچوارچێوەی پرەنسیپى دیموكراتی و سیاسی و مەدەنیدا تێكۆشان بۆ كۆتاییهێنان بەرەوشی داگیركاری و ئەو گێژاوە سەرتاپاگیرییەى لەئارادایە بەرزبكرێتەوە و پەرەى پێبدرێت.
18ـ لەپێناو چارەسەرى دیموكراتیانەى كێشەى كورددا، پێویستە كێشەى گەلی كورد لەكێشەى دەسەڵاتخوازی و سیاسەتى قۆرخكارانەى هێزە دەسەڵاتدارەكانى باشوور جودا ببینرێت. لەم پێناوەدا پێویستە تێكۆشان و چالاكى جەماوەری نەتەوەیی و دیموكراتیانە بەرزبكرێتەوە، تاكو ئیرادەى سەربەخۆی جەماوەرى گەل ببێتە بڕیاردەر و مەرجەع و موخاتیبى یەكەم و سەرەكی كێشەكە.
19ـ لەمیانەى توانستە پەروەردەیی و راگەیاندنییەكانەوە گرنگییەكی جددی بە هوشیاری و لێكتێگەیشتنى نێوان گەلان نەتەوە و ئایین و ئایینزاكان بدرێت و هەوڵی بەدیهێنانی ئاشتی كۆمەڵایەتی و بەیەكەوە ژیانى ئازاد و دیموكراتیانەى گەلان بدرێت.
20ـ هەوڵبدرێت ئەكادیمیایەك بەناوی "ئەكادیمیای بەیەكەوە ژیانى ئازادانەى گەلان" بكرێتەوە و ناوەندەكەی لەشاری كەركوك بێت. ئەركی بڵاوكردنەوەی كولتووری بەیەكەوە ژیانى ئازاد و دیموكراتیانەى گەلان و رۆحی تەبایی و لێبوردەیی و دیالۆگ لەنێوان گەل و نەتەوە و ئەتنیكەكان لەئەستۆی خۆی بگرێت.
21ـ ئەو مەیل و چەمكانە بەر رەخنە و ریسواكردن بدرێت كە هونەر و كولتووری نەتەوەیی بێبەها دەبینێت و دەیشێوێنێت، هەروەها هونەر و كولتوور لە ئەركی مرۆییانەى خۆی بەدوور دەخاتەوە و بازرگانى پێوەدەكات و بێڕۆڵی دەكات، یان وێرانكاری و داڕووخانى رۆحی، هزری، دەروونى، ئەخلاقی و كۆمەڵایەتى تاك و كۆمەڵگا پێشدەخات.
22ـ لەچوارچێوەی ئەو پێشكەوتن و رووداوانەى لەبەهارى ئەم ساڵدا لەگۆڕەپانى باشووردا لەبەرامبەر هێرشە داگیركارییەكەى رژێمى توركیا روویاندا ئەوا: بەرخۆدانى زاپ وەك بەرخۆدانى كەرامەتی نەتەوەیی، شەهید دایكە عائیشە وەك سیمبۆلی پەیوەستبوون بە رەنج و خاك، شەهید هەڤاڵ عەگید جاف (سیروان عەلی) سیمبۆلی گەنجی نەتەوەیی باشوور، رۆژنامەوانانى مەفرەزەی قەڵەم سیمبۆلی "قەڵەمە ئازادیخوازەكانى نەتەوە"، بەرخۆدانى جەماوەری بامەڕنىَ و ئامێد و ئانیشكێ و شێلادزێ و سیریێ وەك سیمبۆلی هەڵوێستى نەتەوەیی لەباشوور" دەناسین و بەرزیان رادەگرین.
لەكۆتاییدا، وەك چۆن سازدانى چوارەمین كۆنگرەى (پ چ د ك) لەم رەوشەدا وەڵامێكی مەزن و سەركەوتنێكی هێژا بوو بۆ بەرخۆدانى "زاپ" ئەوا سازدانى ئەم كۆنگرەیەمان لەشاری كەركوكیشدا وەڵامێكی پڕ شایستە بوو بۆ هەموو ئەو هەڵوێست و سیاسەتانەى كەوا ژیانێكی ئازاد و ئاسوودە و دیموكراتیانە شایستەی ئەم شارە نابینن و ناهێڵن كێشەكانی چارەسەر ببێت.
ئیدی چوارەمین كۆنگرەى (پ چ د ك) لەمیانەى پەیوەستبوون بە رێبازی ئازادیخوازانەى خۆیەوە و بەوپەڕی بەئیرادەبوون و بەبڕیاربوون و بە پەیماندان بە رێبەر ئاپۆ، شەهیدانى رێگای ئازادی و گەلەكەمان و تەواوی مرۆڤایەتى، بەسەركەوتوویی كۆتایی بەكارەكانى خۆی هێنا.
ئەنجوومەنى
پارتى چارەسەری دیموكراتى كوردستان
(PÇDK)
6.5.2008